មន្ទីររៀបចំដែនដីខេត្ត និងរដ្ឋបាលក្រុងប៉ោយប៉ែត ចាប់ផ្តើមយុទ្ធនាការចែកបណ្ណកម្មសិទ្ធិដីធ្លីជាង ៣,៦០០ បណ្ណ ជូនប្រជាពលរដ្ឋក្នុងសង្កាត់ផ្សារកណ្តាល
បន្ទាយមានជ័យ៖ ដើម្បីធានាបាននូវសុវត្ថិភាពគតិយុត្តលើការកាន់កាប់អចលនវត្ថុ និងលើកកម្ពស់ជីវភាពរស់នៅរបស់ប្រជាពលរដ្ឋ នៅព្រឹកថ្ងៃទី១៤ ខែកក្កដា ឆ្នាំ២០២៦ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបន្ទាយមានជ័យ សហការជាមួយរដ្ឋបាលក្រុងប៉ោយប៉ែត បានរៀបចំពិធីចែកវិញ្ញាបនបត្រសម្គាល់ម្ចាស់អចលនវត្ថុ (បណ្ណកម្មសិទ្ធិដីធ្លី) ជាលក្ខណៈប្រព័ន្ធ ជូនដល់ប្រជាពលរដ្ឋមកពីភូមិចំនួន០២ ក្នុងសង្កាត់ផ្សារកណ្តាល ក្រុងប៉ោយប៉ែត សរុបចំនួន ៣,៦៦០ បណ្ណ ក្រោមអធិបតីភាព លោក លៀម សុដា អភិបាលរងខេត្ត តំណាងឯកឧត្តម អ៊ុំ រាត្រី អភិបាល នៃគណៈអភិបាលខេត្ត ។ពិធីនេះត្រូវបានប្រារព្ធឡើងនៅបរិវេណវត្តជិនវ័នសិមារាម (ហៅវត្តម៉ុងចិន) ដោយមានការអញ្ជើញចូលរួមពីសំណាក់ថ្នាក់ដឹកនាំមន្ទីរជំនាញ អាជ្ញាធរក្រុង អាជ្ញាធរសង្កាត់-ភូមិ និងបងប្អូនប្រជាពលរដ្ឋម្ចាស់ដីធ្លីជារូបទៀត ។ យោងតាមរបាយការណ៍ពីមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បណ្ណកម្មសិទ្ធិដែលត្រូវចែកជូនប្រជាពលរដ្ឋក្នុងភូមិទាំង០២ នៃសង្កាត់ផ្សារកណ្តាល រួមមាន ភូមិស្ទឹងបត់ចំនួន ៧៧៧ បណ្ណ និងភូមិគីឡូលេខ៤ ចំនួន ២,៨៨៣ បណ្ណ ។
