បុណ្យកឋិនទានសាមគ្គីដង្ហែចូលវត្តប៉ាហ៊ី ទទួលបានបច្ច័យជាង ២៨៦លានរៀល សម្រាប់បន្តកសាងព្រះវិហារថ្មី

ប៉ៃលិន៖ ពិធីបុណ្យកឋិនទានសាមគ្គី ដង្ហែទៅវេរប្រគេនព្រះសង្ឃដែលគង់ចាំព្រះវស្សាអស់កាលត្រីមាស នៅវត្តពោធិមារាម ហៅវត្តប៉ាហ៊ី ស្ថិតក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន ទទួលបានបច្ច័យសរុបចំនួន ២៨៦.៣៨៦.០០០រៀល ដើម្បីរួមចំណែកបន្តការសាងសង់ព្រះវិហារថ្មីរបស់វត្ត ដែលបច្ចុប្បន្នសម្រេចបានប្រមាណ ៣០ភាគរយ ព្រមទាំងកសាងសមិទ្ធផលនានាបម្រើដល់វិស័យព្រះពុទ្ធសាសនា។ ពិធីបុណ្យកឋិនទានសាមគ្គីនេះ បានប្រព្រឹត្តទៅរយៈពេល២ថ្ងៃ គឺនៅថ្ងៃទី៣១ ខែតុលា និងថ្ងៃទី០១ ខែវិច្ឆិកា ឆ្នាំ២០២៦ ក្រោមការផ្តួចផ្តើមរបស់លោកជំទាវ មហាឧបាសិកាពុទ្ធសាសនូបត្ថម្ភ ស៊ុំ ហៀង សភាពាណិជ្ជកម្មខេត្តប៉ៃលិន ឯកឧត្តម ប្រាក់ សុវណ្ណ និងលោកជំទាវ ស ចេង ព្រមទាំងលោកជំទាវ មហាឧបាសិកាពុទ្ធសាសនូបត្ថម្ភក៍ ស ពៅ ដោយមានការចូលរួមពីថ្នាក់ដឹកនាំ មន្ត្រីរាជការ និងពុទ្ធបរិស័ទជិតឆ្ងាយយ៉ាងច្រើនកុះករ។