និស្សិតចំនួន១២០នាក់ នៃសាកលវិទ្យាល័យគ្រប់គ្រង និងសេដ្ឋកិច្ច សាខាខេត្តបន្ទាយមានជ័យ បានទទួលការអប់រំផ្សព្វផ្សាយអំពីប្រវត្តិចលនាកាកបាទក្រហម និងអឌ្ឍចន្ទក្រហម គោលការណ៍គ្រឹះទាំង៧ ច្បាប់មនុស្សធម៌អន្តរជាតិ ព្រមទាំងចំណេះដឹងជាមូលដ្ឋានស្តីពីវិជ្ជាសង្គ្រោះបឋម ដើម្បីចូលរួមលើកកម្ពស់ការយល់ដឹងអំពីសកម្មភាពមនុស្សធម៌ និងត្រៀមលក្ខណៈជួយសង្គ្រោះអ្នកដទៃក្នុងករណីមានគ្រោះអាសន្ន។
នាព្រឹកថ្ងៃទី២៥ ខែតុលា ឆ្នាំ២០២៦ លោក ឃ្លោក នួយ អភិបាលរងខេត្តបន្ទាយមានជ័យ តំណាងឯកឧត្តម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ បានអញ្ជើញចូលរួមក្នុងពិធីប្រលែងកូនត្រីចំនួន ២០០,០០០ក្បាល ក្រោមប្រធានបទ «ធនធានជលផលដើម្បីអនាគតខ្មែរ» នៅតំបន់អភិរក្សវត្តស្វាយចាស់ ដែលរៀបចំឡើងដោយក្រុមហ៊ុន GANZBERG ក្នុងគោលបំណងរួមចំណែកអភិរក្ស និងបង្កើនធនធានជលផលធម្មជាតិ។
អធិការដ្ឋាននគរបាលក្រុងសិរីសោភ័ណ ខេត្តបន្ទាយមានជ័យ បានជូនដំណឹងដល់ប្រជាពលរដ្ឋដែលរស់នៅក្នុងភូមិសាស្ត្រក្រុងសិរីសោភ័ណ មានអាយុចាប់ពី១៥ឆ្នាំឡើងទៅ និងប្រជាពលរដ្ឋដែលមានអត្តសញ្ញាណបណ្ណសញ្ជាតិខ្មែរជិតផុត ឬផុតសុពលភាព សូមអញ្ជើញទៅបំពេញបែបបទ និងថតអត្តសញ្ញាណបណ្ណសញ្ជាតិខ្មែរ ដើម្បីធានាថាមានឯកសារសម្គាល់អត្តសញ្ញាណត្រឹមត្រូវ និងមានសុពលភាពសម្រាប់ប្រើប្រាស់តាមតម្រូវការ។
នៅថ្ងៃទី២៣ ខែតុលា ឆ្នាំ២០២៦ លោក ឃ្លោក នួយ អភិបាលរងខេត្តបន្ទាយមានជ័យ តំណាងឯកឧត្តម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ បានដឹកនាំក្រុមការងារចុះត្រួតពិនិត្យសកម្មភាពចាក់ដីបំពេញ និងជួសជុលផ្លូវដែលរងការខូចខាតដោយសារជំនន់ទឹកភ្លៀងនាពេលកន្លងមក នៅក្នុងភូមិសាស្ត្រឃុំណាំតៅ និងឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ដើម្បីសម្រួលដល់ការធ្វើដំណើររបស់ប្រជាពលរដ្ឋនៅតាមមូលដ្ឋាន។
មន្ត្រីជំនាញការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ បានបន្តអនុវត្តយុទ្ធនាការចាក់វ៉ាក់សាំងការពារជំងឺឆ្កែឆ្កួតជូនសត្វឆ្កែ និងឆ្មា នៅទូទាំងខេត្ត ដោយសម្រេចចាក់វ៉ាក់សាំងបានសរុបចំនួន ២៧.៥៧៦ ក្បាល ក្នុងរយៈពេល៥ថ្ងៃ នៃផែនការអនុវត្តសរុប១០ថ្ងៃ ដើម្បីរួមចំណែកទប់ស្កាត់ការរីករាលដាលនៃជំងឺដ៏កាចសាហាវនេះ និងការពារសុខភាពសត្វ ព្រមទាំងសុខភាពសាធារណៈ។
