ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានអមដំណើរដោយ លោក ហ៊ឹល រ៉ាយ៉ា អភិបាលរងខេត្ត ព្រមទាំងក្រុមការងារ បានអញ្ជើញចុះសួរសុខទុក្ខ និងនាំយកក្តីស្រឡាញ់ដ៏ជ្រាលជ្រៅទៅផ្ទាល់ជាមួយបងប្អូនប្រជាពលរដ្ឋដែលកំពុងស្នាក់នៅតាមទីទួលសុវត្ថិភាព ក្នុងបណ្តាក្រុង-ស្រុក។

ទោះបីជាស្ថានភាពទឹកជំនន់បានចាប់ផ្តើមស្រកចុះជាបណ្តើរៗ និងជាពេលដែលបងប្អូនត្រូវត្រឡប់ទៅកាន់លំនៅឋានវិញក៏ដោយ ក៏ឯកឧត្តមអភិបាលខេត្តនៅតែបន្តឈរជិត និងយកចិត្តទុកដាក់ខ្ពស់បំផុតចំពោះសុខទុក្ខរបស់ពួកគាត់។ ជាមួយគ្នានោះ ឯកឧត្តម និងក្រុមការងារ បានបន្តចុះពិនិត្យស្ថានភាពទឹកជាក់ស្តែង និងផលប៉ះពាល់ដំណាំស្រូវរបស់ប្រជាកសិករ ដោយមិនទុកឱ្យប្រជាពលរដ្ឋណាម្នាក់រងគ្រោះដោយឯកោនោះឡើយ និងប្តេជ្ញាជួយរៀបចំវិធានការអន្តរាគមន៍ ស្តារឡើងវិញ ដើម្បីជួយសម្រាលការលំបាករបស់បងប្អូនឱ្យបានទាន់ពេលវេលា។